გაეროს ევროპის ეკონომიკური კომისიის (UNECE) დახმარებით, საქართველოს გარემოს დაცვისა და სოფლის მეურნეობის სამინისტროს მიერ შემუშავდა „წყლის რესურსების მართვის შესახებ“ ახალი კანონპროექტი. შემუშავებული კანონპროექტი შესაბამისობაშია ევროკავშირის წყლის ჩარჩო დირექტივასთან და ემყარება წყლის რესურსების ინტეგრირებული მართვის პრინციპებს. კერძოდ, ახალი ჩარჩო კანონმდებლობა ქვეყანაში სააუზო მართვას დანერგავს სააუზო მართვის გეგმების მომზადებისა და განხორციელების საშუალებით.
სააუზო მართვის გეგმა წარმოადგენს ინტეგრირებული მართვის მექანიზმს მდინარის აუზის დონეზე. გეგმის შესადგენად მნიშვნელოვანია მდინარის აუზში არსებული სიტუაციის კარგი ანალიზი და ანალიზის საფუძველზე, სხვადასხვა დაინტერესებულ მხარესთან კონსულტაციით, იმგვარი ქმედებების იდენტიფიცირება, რომელიც უზრუნველყოფს კონკრეტული მდინარის აუზში არსებული გარემოს გაუჯობესებას.
საქართველოს ტერიტორია დაყოფილია მდინარეთა 6 სააუზო ტერიტორიულ ერთეულად, რომლებიც ან შავი ზღვის ან კასპიის ზღვის აუზებს მიეკუთვნებიან. შავი ზღვის აუზს მიეკუთვნება: ენგური-რიონის, ჭოროხი-აჭარისწყალის და ბზიფი-კოდორის სააუზო ტერიტორიული ერთეულები. ხოლო, მტკვარი, ალაზანი-იორი და ხრამი-დებედა - კასპიის ზღვის აუზის შემადგენელი ნაწილია.
სააუზო მართვის გეგმის სამუშაო ვერსია უკვე მომზადებულია ჭოროხი-აჭარისწყალის სააუზო ტერიტორიული ერთეულისთვის, ხოლო დამატებით ორი გეგმის სამუშაო ვერსია, ხრამი-დებედას და ალაზანი-იორის სააუზო უბნებისთვის, შემუშავების პროცესშია.
სააუზო მართვის გეგმის სამუშაო ვერსია მომზადდა REC-Caucasus კონსორციუმის მიერ ევროკავშირის მიერ დაფინანსებული პროექტის ფარგლებში: საერთაშორისო მდინარეთა აუზების გარემოსდაცვითი პროექტი (ENPI-EPIRB).
სააუზო მართვის გეგმის ამოცანაა მოაგვაროს წყლის რესურსების მართვის ისეთი მნიშვნელოვანი საკითხები, რომლებიც საფრთხეს უქმნის სააუზო უბნის წყლის ობიექტების ეკოლოგიურ მახასიათებლებს, ბიოლოგიური, ზოგადი ფიზიკო-ქიმიური და ჰიდრომორფოლოგიური მახასიათებლების ჩათვლით, რიგი გარემოსდაცვითი ამოცანების დასახვისა და ღონისძიებათა პროგრამის შემუშავების გზით.
სააუზო მართვის გეგმების სამუშაო ვერსიები არის მომზადების პროცესში REC-Caucasus კონსორციუმის მიერ ევროკავშირის დაფინანსებული პროექტის ფარგლებში: ევროკავშირის წყლის ინიციატივა პლიუსი (EUWI+).
იხილეთ:
