თემები - WiseGeorgia

მდგრადი განვითარება და წყალი

საერთაშორისო პროცესები

მდგრად განვითარებასთან დაკავშირებული მნიშვნელოვანი პროცესები დაიწყო 2015 წელს, როდესაც გაეროს წევრი ქვეყნები 2030 წლის მდგრადი განვითარების დღის წესრიგში ინტეგრირებულ ერთობლივ ქმედებებზე შეთანხმდნენ. 2030 წლისთვის დაგეგმილი ქმედებები აისახა მდგრადი განვითარების 17 მიზანსა (SDGs) და მათთან დაკავშირებულ 169 ამოცანაში. ხოლო, იმისათვის, რომ მიზნებისა და ამოცანების მიმართ მიღწეული პროგრესი გაზომვადი ყოფილიყო, თითოეული ამოცანის ქვეშ შემუშავდა გარკვეული რაოდენობის გლობალური ინდიკატორი, ჯამში კი - დაახლოებით 230 ინდიკატორი. დღის წესრიგის მიზანია გააერთიანოს გლობალური ძალისხმევა და დაეხმაროს ქვეყნებს მდგრადი განვითარების მიღწევაში, იმგვარად, რომ ძირითადი პრინციპი „არავინ დარჩეს პროცესის მიღმა“ გათვალისწინებული იქნას თითოეულ ქმედებაში.

გამომდინარე იქედან, რომ წყალი უკავშირდება სხვადასხვა სექტორულ მიმართულებას, წყალთან დაკავშირებული ქმედებები შესაბამისად არის ასახული სხვადასხვა მიზნის ქვეშ. ქმედებები მოიცავს ისეთ მიმართულებებს, როგორიცაა სუფთა წყალზე ხელმისაწვდომობა, წყლის რესურსების ეფექტიანი და მდგრადი მართვა და წყალთან დაკავშირებული ეკოსისტემების დაცვა. თუმცაღა, წყალთან უშუალოდ დაკავშირებულ მიზანს წარმოადგენს რიგით მე-6 მიზანი წყლის მდგრადი მართვისა და სანიტარული ნორმების დაცვის საყოველთაო უზრუნველყოფის შესახებ. მიზნის ქვეშ კი გაერთიანებულია რიგი ამოცანები და მათი ინდიკატორები, რომლებიც ქვეყნებს წყლის მდგრადი მართვისა და სანიტარული ნორმების დაცვის უზრუნველყოფისკენ თანმიმდევრული ნაბიჯების გადადგმაში ეხმარება.

ეროვნული პროცესები

იმისათვის, რომ საერთაშორისო ძალისხმევაში მიეღო მონაწილეობა, საქართველოს მთავრობამ მოახდინა ჩვიდმეტივე მიზნის, მათი გარკვეული რაოდენობის ამოცანისა და ინდიკატორის ნაციონალიზაცია. აღსანიშნავია, რომ მიმდინარეობს ნაციონალიზებული მიზნების და ამოცანების შესაბამისი აქტივობების ეროვნულ პოლიტიკურ დოკუმენტებში ინტეგრირება/ასახვა. გარდა ამისა, ნაციონალიზაციის პროცესში მიზნების, ამოცანებისა და ინდიკატორების მიმართ განისაზღვრა საბაზისო და სამიზნე მაჩვენებლები. ჯამში, ქვეყანამ მოახდინა 17 მიზნის, 90-ზე მეტი ამოცანისა და 200-ზე მეტი ინდიკატორის ნაციონალიზება. წყალთან დაკავშირებული მე-6 მიზნის ფარგლებში, ქვეყნის მიერ ამ ეტაპზე ნაციონალიზებულია მხოლოდ ორი 6.1 და 6.2. ამოცანა. 6.1 უკავშირდება ყველა ადამიანისთვის უსაფრთხო და ხელმისაწვდომ წყალზე საყოველთაო და თანაბარი წვდომის უზრუნველყოფას, ხოლო 6.2 უკავშირდება ყველა ადამიანისთვის ადეკვატურ და თანაბარ სანიტარულ ჰიგიენურ პირობებზე წვდომის მიღწევას.

საქართველო ჩართულია გლობალურ დონეზე არსებულ მდგრადი განვითარების მიზნების პროგრესის განხილვის პროცესში. კერძოდ, ქვეყანამ 2016 წელს წარადგინა პირველი ნებაყოფლობითი ეროვნული ანგარიში (VNR) გაეროს მდგრადი განვითარების მაღალი დონის პოლიტიკურ ფორუმზე.

საქართველოში მდგრადი განვითარების მიზნებთან დაკავშირებული პროცესების შესახებ დამატებითი ინფორმაცია იხილეთ აქ.

ანგარიშგება და მონაცემები წყალთან დაკავშირებული ინდიკატორების - 6.5.1 და 6.5.2 - მიმართ

მე-6 მიზნის ერთ-ერთი ყველაზე მნიშვნელოვანი ამოცანაა 6.5, რომელიც უკავშირდება წყლის რესურსების ინტეგრირებულ მართვას ყველა დონეზე. იმისათვის, რომ ამოცანის მიმართ განხორციელებული პროგრესი იყოს გაზომვადი, ამოცანას გააჩნია ორი ინდიკატორი: ერთი (6.5.1), რომელიც ზომავს წყლის რესურსების ინტეგრირებული მართვის დანერგვის ხარისხს და მეორე (6.5.2), რომელიც აფასებს ტრანსსასაზღვრო წყლებზე არსებულ თანამშრომლობას მოსაზღვრე ქვეყნებს შორის. მიუხედავად იმისა, რომ აღნიშნული ორი ინდიკატორი საქართველოს მიერ ჯერ არ არის ნაციონალიზებული, ქვეყანამ მონაწილეობა მიიღო 2017 წელს ინდიკატორების მიმართ განხორციელებულ საბაზისო ანგარიშგებებში და ახლა ემზადება 2020 წელს ინდიკატორების მიმართ დაგეგმილ რიგით მეორე ანგარიშგების პროცესებისთვის.

6.5.1 ინდიკატორის მიმართ საქართველოს მიერ განხორციელებული ანგარიშგების შესახებ მეტი ინფორმაციისთვის იხილეთ 6.5.1 ინდიკატორის განხორციელების მოკლე მიმოხილვა ან ჩამოტვირთეთ სრული ანგარიში.

6.5.2 ინდიკატორის მიმართ საქართველოს მიერ განხორციელებული ანგარიშგების შესახებ მეტი ინფორმაციისთვის იხილეთ სრული ანგარიში.