თემები

კლიმატის ცვლილების გაეროს ჩარჩო კონვენციის მიმართ საქართველოს მესამე ეროვნულ შეტყობინებაში, რომელიც საქართველომ 2015 წელს წარადგინა, საყურადღებო და მნიშვნელოვანი დასკვნებია წყლის რესურსებთან დაკავშირებით. საქართველოში კლიმატის ცვლილების ერთ-ერთ ხილულ შედეგს მყინვარების უკანდახევა წარმოადგენს, რაც მომავალში სავარაუდოდ ზემოქმედებას მოახდენს მდინარეებისა და ტბების წყლის ჰიდროლოგიურ რეჟიმზე. მეცნიერული დაკვირვებები გვიჩვენებს, რომ უკანასკნელი 50 წლის მანძილზე საქართველოს მყინვარების მთლიანი ფართობი 30%-ით შემცირდა. მიუხედავად იმისა, რომ მყინვარული წყლის წილი მდინარეების წლიურ ჩამონადენში შედარებით მცირეა (დაახლოებით 1.4%), ის მნიშვნელოვან როლს ასრულებს ივლისსა და აგვისტოში მდინარეების ჩამონადენის ფორმირებასა და წლის განმავლობაში განაწილებაზე. მაგალითად, ზაფხულის ამ ორი თვის განმავლობაში მდ. ენგურის ჩამონადენში მყინვარული წყლის წილი 30%-ს აჭარბებს. მყინვარების უკანდახევის პირველი შედეგი მყინვარული ტბების ჩამოყალიბებაა, რომლებმაც ძლიერი ნალექების დროს შესაძლოა ბუნებრივი კატასტროფები გამოიწვიოს. 2014 წლის დევდორაკის მყინვარის მოწყვეტის შემთხვევა, თანმხლები ღვარცოფითა და მეწყერით, რომელმაც ადამიანების სიკვდილი და ინფრასტრუქტურის დაზიანება გამოიწვია, კლიმატის ცვლილებით გამოწვეული ბუნებრივი კატასტროფის თვალსაჩინო მაგალითს წარმოადგენს. კლიმატის ცვლილების პროგნოზების თანახმად, მყინვარების უკანდახევის პროცესი მომავალშიც გაგრძელდება.

საქართველომ უკვე გადადგა მნიშვნელოვანი ნაბიჯები კლიმატის ცვლილებასთან ადაპტაციის კუთხით. მომზადებულია კლიმატის ცვლილებასთან ადაპტაციის ეროვნული გეგმა სოფლის მეურნეობის სექტორისთვის. საქართველოს მთავრობა იწყებს 70 მილიონი აშშ დოლარის ღირებულების შვიდწლიანი პროგრამის განხორციელებას, რომლის მიზანია საქართველოს მოსახლეობის დაცვა კლიმატის ცვლილებით განპირობებული ბუნებრივი კატასტროფებისაგან.